Jam 2 | AAK | STEP | Gí̵ nɨrɨxí̵meáyí̵ne', seyí̵ne' negí̵ Ámɨná Jisasɨ Kiraisomɨ —O Gorɨxo nikí̵nɨrɨ ŋweaŋí̵pɨ tí̵nɨ xɨxenɨ nimónɨrɨ ŋweaŋorɨnɨ. Omɨ dɨŋí̵ nɨwɨkwí̵roróná seáyɨ e imónɨgí̵áyo we' íkwiaŋwí̵yo uŋwɨrárɨro sɨpí imónɨgí̵áyo paimɨmí̵ wiro mepa e'í̵rɨxɨnɨ.

James 2

“Wíyo we' íkwiaŋwí̵yo uŋwɨrárɨro wíyo paimɨmí̵ wiro mepanɨ.” urɨŋí̵ nánɨrɨnɨ.

1 Gí̵ nɨrɨxí̵meáyí̵ne', seyí̵ne' negí̵ Ámɨná Jisasɨ Kiraisomɨ —O Gorɨxo nikí̵nɨrɨ ŋweaŋí̵pɨ tí̵nɨ xɨxenɨ nimónɨrɨ ŋweaŋorɨnɨ. Omɨ dɨŋí̵ nɨwɨkwí̵roróná seáyɨ e imónɨgí̵áyo we' íkwiaŋwí̵yo uŋwɨrárɨro sɨpí imónɨgí̵áyo paimɨmí̵ wiro mepa e'í̵rɨxɨnɨ. 2 Ayí̵ rɨpɨ seararɨŋɨnɨ. Seyí̵ne' Gorɨxomɨ yayí̵ wianɨro nánɨ awí eánɨgí̵e ámá wau' —Wí̵o amɨpí wí mɨmu'rónɨŋorɨnɨ. Rapɨrapí̵ awiaxí̵ nɨyínɨrɨ we' ramaxí̵ sí̵ŋá gorí̵ tí̵nɨ imɨxɨnɨŋí̵wá íkíkí̵ ninɨmáná í̵wiapí̵orɨnɨ. Wí̵o amɨpí mayí̵ sa ikwiárɨnɨŋí̵ imónɨŋorɨnɨ. Rapɨrapí̵ kíyí̵ óí̵ miní̵ yárɨŋu' nɨyínɨmáná í̵wiapí̵orɨnɨ. 3 Awau' í̵wiapáná seyí̵ne' rapɨrapí̵ awiaxí̵ yínɨŋomɨ ayá tí̵nɨ yayí̵ nɨwiro “Sí̵mí̵ re íkwiaŋwí̵ naŋí̵ imónɨŋí̵ rɨnamɨ ŋweaɨ.” urɨro amɨpí mayí̵ sa ikwiárɨnɨŋí̵ imónɨŋomɨ “Xwí̵á yánɨ jí̵eranɨ, negí̵ sɨkwí̵ tí̵ŋí̵ reranɨ, ŋweaɨ.” urɨro nerónáyí̵, 4 “Apimɨ dánɨ meyírónɨpa yarɨŋwɨnɨ.” rɨseaimónarɨnɨ? Oweoɨ, sewanɨŋí̵yí̵ne' rɨxa neyírónɨro “Wiene seáyɨ e imónɨrɨ wiene sɨpí imónɨrɨ eŋwɨnɨ.” nɨyaiwiróná ámá opisí̵ aŋí̵yo dánɨ xwɨrɨxí̵ yarí̵ná eyíroarɨgí̵áwa dɨŋí̵ ínɨmɨ nɨkwí̵rónɨmáná eyíroarɨgí̵ápa seyí̵ne' enɨ axí̵pɨ dɨŋí̵ ínɨmɨ nɨkwí̵rónɨmáná eyírónarɨŋowa. 5 Gí̵ nɨrɨxí̵meáyí̵ne', dɨŋí̵ sɨxí̵ seayiŋáyí̵ne', arí̵á nípoyɨ. Gorɨxo ámá xí̵oyá imóní̵í̵rɨxɨnɨrɨ í̵á nɨyamɨxɨrí̵ná ámá xwí̵á tí̵yo dáŋí̵ nɨyí̵yá sɨŋwí̵yo dánɨ ámá amɨpí mayí̵ sa ikwiárɨnɨŋí̵ imónɨgí̵áyí̵ dɨŋí̵ nɨwɨkwí̵rorɨŋí̵pimɨ dánɨ amɨpí Jisaso neaiiŋí̵pɨ wí mɨmu'rónɨgí̵áyí̵ imónɨpí̵rí̵a nánɨ í̵á muyamɨxɨpa eŋí̵ranɨ? Ayí̵ xegí̵ xwioxí̵yo —E ámá xí̵omɨ dɨŋí̵ sɨxí̵ uyarɨgí̵áyo “Nɨŋweapí̵rí̵árɨnɨ.” urɨŋerɨnɨ. E ŋweáí̵rɨxɨnɨrɨ í̵á muyamɨxɨpa eŋí̵ranɨ? 6 Seyí̵ne' e neróná ámá sa ikwiárɨnɨgí̵áyo ayá wimoarɨgí̵árɨnɨ. Ámá xeanɨŋí̵ nɨseaikárɨro xwɨrɨxí̵ oumeaneyɨnɨro eŋí̵ nápe'mɨ nuro opisí̵ aŋí̵ tí̵ŋí̵ e seawárarɨgí̵áyí̵ gɨyí̵rɨnɨ? Ayí̵ ámá amɨpí xwí̵á re weŋí̵pɨ wí mɨmu'rónɨgí̵áyí̵ menɨranɨ? 7 Ayí̵ enɨ yoí̵ naŋí̵ seyí̵ne' Kiraisomɨ xí̵darɨŋagí̵a nánɨ seaŋwɨrárɨnɨŋí̵pimɨ ikayí̵wí̵ mumearɨpa yarɨgí̵áranɨ? 8 Seyí̵ne' ŋwí̵ ikaxí̵ negí̵ mɨxí̵ ináyí̵ Jisaso nearɨŋí̵ Bɨkwí̵yo re nɨrɨnɨrɨ eánɨŋí̵ rɨpɨ, “Jɨwanɨŋoxɨ nánɨ dɨŋí̵ sɨpí inarɨŋí̵pa ámá sɨŋwí̵ wɨní̵í̵ gɨyí̵ gɨyo enɨ axí̵pɨ wíɨrɨxɨnɨ.” nɨrɨnɨrɨ eánɨŋí̵ apɨ xɨxenɨ nɨxí̵dɨrónáyí̵, naŋí̵ yarɨŋoɨ. 9 E nɨsearɨrɨ aí seyí̵ne' ámá seáyɨ e imónɨgí̵áyo píránɨŋí̵ umero sɨpí imónɨgí̵áyo paimɨmí̵ wiro nerónáyí̵, í̵wí̵ nero ŋwí̵ ikaxí̵ rɨnɨŋí̵pɨ wiaíkiarɨgí̵áyí̵ne' eŋagí̵a nánɨ apimɨ dánɨ xwɨyí̵á meárɨnɨpaxí̵rɨnɨ. 10 Ayí̵ rɨpɨ nánɨrɨnɨ. Ámá ŋwí̵ ikaxí̵ rɨnɨŋí̵ nɨpimɨnɨ píránɨŋí̵ oxí̵dɨmɨnɨrɨ nemáná ná bimɨnɨ nɨwiaíkirí̵náyí̵, xwɨyí̵á ámá ŋwí̵ ikaxí̵ nɨpimɨnɨ wiaíkíí̵áyí̵ meárɨní̵ápa axí̵pɨ e meárɨnɨpaxí̵rɨnɨ. 11 Ayí̵ rɨpɨ nánɨ seararɨŋɨnɨ. Bɨkwí̵yo ŋwí̵ ikaxí̵ re nɨrɨnɨrɨ eánɨŋí̵ rɨpɨ, “Meánɨgí̵áyí̵ne' í̵wí̵ minɨpanɨ.” rɨŋo, ayí̵ ŋwí̵ ikaxí̵ “Nɨwiápí̵nɨmearɨ ámá mɨpɨkipanɨ.” enɨ rɨŋɨnigɨnɨ. Seyí̵ne' meánɨgí̵áyí̵ tí̵nɨ í̵wí̵ minɨpa nero aí nɨwiápí̵nɨmearo ámá nɨpɨkirí̵náyí̵, ŋwí̵ ikaxí̵ rɨnɨŋí̵pɨ wiaíkíí̵áyí̵ne' imónɨŋagí̵a nánɨ rarɨŋɨnɨ. 12 Ayɨnánɨ pí pí seyí̵ne' nerónáranɨ, nɨrɨrónáranɨ, re nɨyaiwiro dɨŋí̵ tí̵nɨ e'í̵rɨxɨnɨ, “Ŋwí̵ ikaxí̵ rɨnɨŋí̵pɨ —Apɨ í̵wí̵ yarɨŋwápimɨ dánɨ gwí̵nɨŋí̵ neayárɨnɨŋí̵pɨ neaíkweawárɨpaxí̵ imónɨŋí̵pɨrɨnɨ. Ŋwí̵ ikaxí̵ rɨnɨŋí̵ apimɨ dánɨ Gorɨxo eyeyírómí̵ neainí̵árɨnɨ.” nɨyaiwiro dɨŋí̵ tí̵nɨ e'í̵rɨxɨnɨ. 13 O ámáyo eyeyírómí̵ nɨwirí̵ná ámá wigí̵ wíyo ayá murɨmɨxí̵ wiarɨgí̵áyo xí̵o enɨ ayo ayá murɨmɨxí̵ xɨxenɨ xwɨyí̵á umeárɨní̵á eŋagɨ nánɨ rarɨŋɨnɨ. E nerɨ aí wigí̵ wínɨyo ayá nurɨmɨxɨrɨ wiarɨgí̵áyo xí̵o enɨ ayo ayá urɨmɨxáná apimɨ dánɨ xɨxenɨ roayírónɨpí̵rí̵árɨnɨ.

Ámáyo arɨrá mɨwipa neróná “Gorɨxomɨ dɨŋí̵ wɨkwí̵roŋwɨnɨ.” rɨnarɨgí̵áyí̵ nánɨ urɨŋí̵ nánɨrɨnɨ.

14 Gí̵ nɨrɨxí̵meáyí̵ne', ámá go go wíyo arɨrá bɨ mɨwí “Gorɨxomɨ dɨŋí̵ wɨkwí̵roŋɨnɨ.” nɨrɨnɨrí̵náyí̵, o “Dɨŋí̵ wɨkwí̵roŋɨnɨ.” rɨnarɨŋí̵pɨ surí̵má imónɨnɨ. “O ámá nánɨ dɨŋí̵ sɨpí mɨwiní̵ ‘Gorɨxomɨ dɨŋí̵ wɨkwí̵roŋɨnɨ.’ rarɨŋí̵pimɨ dánɨnɨ erí̵kiemeánɨpaxí̵rɨnɨ.” rɨseaimónarɨnɨ? Oweoɨ. 15 Segí̵ se'rɨxí̵meá wo ámɨ wo iyí̵á nánɨranɨ, aiwá sí̵á ayimɨ nɨní̵pɨ nánɨranɨ, dí̵wí̵ ikeamónarɨŋagɨ nɨwɨnɨrí̵ná 16 amɨpí xí̵o dí̵wí̵ ikeamónarɨŋí̵pɨ bɨ mɨnɨ mɨwí re nurɨrí̵náyí̵, “Joxɨ ‘Nɨwayɨrónɨrɨ oŋweanɨ.’ nimónarɨnɨ. Joxɨ nurɨ rí̵á rɨsínɨnɨ nánɨ iyí̵á pánɨrɨ agwí̵ ímɨ rɨyinɨ nánɨ aiwá nɨrɨ eɨ.” nurɨrí̵náyí̵, “Amɨpí xí̵o dí̵wí̵ ikeamónarɨŋí̵pɨ nánɨ xwɨyí̵á e urí̵ápɨ ananɨ arɨrá wipaxí̵rɨnɨ.” rɨseaimónarɨnɨ? Oweoɨ, ráí̵nɨŋí̵ imónɨŋí̵pɨnɨ urarɨnɨ. 17 “Gorɨxomɨ dɨŋí̵ wɨkwí̵roŋɨnɨ.” rarɨŋí̵pɨ enɨ axí̵pɨ imónɨnɨ. Ámáyo arɨrá mɨwí sa apɨnɨ nɨrɨrí̵náyí̵, dɨŋí̵ wɨkwí̵roarɨŋí̵ apɨ rɨxa íkwí̵kwí̵ yinɨ. 18 E nerɨ aí ámá wo re nɨrɨní̵árɨnɨ, “Ámá wí Gorɨxomɨ dɨŋí̵ nɨwɨkwí̵rorí̵ná ámáyo arɨrá wiarɨŋagí̵a aiwɨ nionɨ ámáyo arɨrá mɨwí Gorɨxomɨ dɨŋí̵nɨ nɨwɨkwí̵rorí̵ná ‘Ayí̵ ananɨrɨnɨ.’ nimónarɨnɨ.” Ámá wo e nɨrɨní̵á eŋagɨ aí nionɨ omɨ re urɨmí̵árɨnɨ, “Joxɨ ámáyo arɨrá mɨwí ‘Gorɨxomɨ dɨŋí̵ wɨkwí̵roŋɨnɨ.’ rarɨŋí̵pɨ nionɨ ‘O nepa dɨŋí̵ wɨkwí̵ronɨ.’ siaiwimɨ nánɨ arɨge níwapɨyíáná ‘Neparɨnɨ.’ yaiwimí̵ɨnɨ?” nurɨrɨ ámɨ re urɨmí̵árɨnɨ, “Joxɨ ‘O “Gorɨxomɨ dɨŋí̵ wɨkwí̵roŋɨnɨ.” rarɨŋí̵pɨ neparɨnɨ.’ niaiwirɨ nánɨ ámáyo arɨrá wiarɨŋí̵pimɨ dánɨ síwapɨyíáná ‘O nepa dɨŋí̵ wɨkwí̵ronɨ.’ niaiwirí̵ɨnɨ.” nurɨrɨ 19 re urɨmí̵árɨnɨ, “Joxɨ dɨŋí̵ re nɨyaiwirɨ ɨkwí̵roŋɨnɨ, ‘Ŋwí̵á imónɨŋo, ayí̵ ná wonɨ Gorɨxorɨnɨ.’ Joxɨ dɨŋí̵ e nɨyaiwirɨ nɨkwí̵rorí̵ná naŋí̵ yarɨŋagɨ aiwɨ rɨpɨ nánɨ enɨ dɨŋí̵ rɨmoŋɨnɨ? Imí̵óyí̵ enɨ dɨŋí̵ axí̵pɨ nɨyaiwiro nɨkwí̵roro aí Gorɨxo rí̵á ikeaárɨní̵á eŋagɨ nánɨ eŋí̵ óí̵ ikárɨnarɨgí̵árɨnɨ.” nurɨrɨ 20 re urɨmí̵árɨnɨ, “Majɨmají̵á ikárɨnarɨŋí̵ roxɨnɨ, ámáyo arɨrá mɨwí ‘Gorɨxomɨ dɨŋí̵ wɨkwí̵roŋɨnɨ.’ rarɨŋí̵pɨ ‘Surí̵má rí̵a imónɨnɨ?’ mɨyaiwipaxoxɨranɨ? 21 Eŋíná negí̵ arí̵o Ebɨrí̵amo sekaxí̵ Gorɨxo urí̵í̵pɨ tí̵nɨ xɨxenɨ xegí̵ xewaxo Aisako sí̵ŋá íráí̵ noga peyinɨŋe dánɨ rɨdɨyowá emɨnɨrɨ yarí̵ná Gorɨxo o e e'í̵pimɨ dánɨ ‘We' rónɨŋorɨnɨ.’ mɨrárɨpa reŋɨnigɨnɨ? 22 Ayɨnánɨ nene dɨŋí̵ re yaiwipaxí̵rɨnɨ, ‘Ebɨrí̵amo Gorɨxomɨ dɨŋí̵ nɨwɨkwí̵rorí̵ná dɨŋí̵nɨ wɨkwí̵roŋí̵manɨ. Gorɨxo urɨŋí̵pɨ xɨxenɨ nerí̵ná wɨkwí̵roŋí̵ eŋagɨ nánɨ dɨŋí̵ o wɨkwí̵roŋí̵pɨ xewanɨŋo arí̵á nɨwirɨ eŋí̵pimɨ dánɨ yóí̵ imónɨŋí̵rɨnɨ.’ yaiwipaxí̵rɨnɨ. 23 Rɨpɨ enɨ yaiwipaxí̵rɨnɨ, ‘Negí̵ arí̵o e nerí̵ná xí̵o nánɨ Bɨkwí̵yo re nɨrɨnɨrɨ eánɨŋí̵ rɨpɨ, “Ebɨrí̵amo Gorɨxomɨ dɨŋí̵ wɨkwí̵róagɨ nánɨ ‘We' rónɨŋí̵ imónɨŋorɨnɨ.’ yaiwiŋɨnigɨnɨ.” nɨrɨnɨrɨ eánɨŋí̵pɨ xɨxenɨ imónɨŋɨnigɨnɨ. Ayɨnánɨ Ebɨrí̵amo Gorɨxo tí̵nɨ nɨkumɨxɨnɨrɨ emearɨŋí̵ woyɨ ragí̵árí̵anɨ?’ yaiwiárɨpaxí̵rɨnɨ.” urɨmí̵árɨnɨ. 24 Agwɨ seyí̵ne' nɨjí̵á re imónɨŋoɨ, “Ámá ‘Nionɨ Gorɨxomɨ dɨŋí̵ wɨkwí̵roŋɨnɨ.’ rarɨŋí̵pimɨ dánɨnɨ Gorɨxo ‘We' rónɨŋorɨnɨ.’ rárarɨŋí̵manɨ. Xí̵omɨ dɨŋí̵ nɨwɨkwí̵rorí̵ná xí̵o wimónarɨŋí̵pɨ yarɨŋí̵pimɨ dánɨ ‘We' rónɨŋorɨnɨ.’ rárarɨŋí̵rɨnɨ.” Apɨ nánɨ seyí̵ne' rɨxa nɨjí̵á imónɨŋoɨ. 25 Eŋíná iyí̵ ede dánɨ wagí̵á Rexapíyɨ rɨnɨŋí —Í Josuao ámá wau' aŋí̵ apimɨ sɨŋwí̵ owɨnárí̵piyɨnɨrɨ urowáre'napáná nipemeámɨ nurɨ óí̵ wíyo urowárɨŋírɨnɨ. Í enɨ axí̵pɨ Gorɨxomɨ dɨŋí̵ nɨwɨkwí̵rorí̵ná e e'í̵pimɨ dánɨ Gorɨxoyá sɨŋwí̵yo dánɨ apɨxí̵ we' rónɨŋí mimónɨpa reŋɨnigɨnɨ? 26 Ayɨnánɨ re rɨpaxí̵rɨnɨ, “Ámá dɨŋí̵pɨ sɨnɨ sɨxí̵ mínɨŋáná waráo pɨyí̵ eŋí̵pa ámá Gorɨxo e e'í̵rɨxɨnɨrɨ wimónɨŋí̵pɨ me' dɨŋí̵pɨnɨ wɨkwí̵roarɨgí̵ápɨ axí̵pí̵nɨŋí̵ nimónɨrɨ íkwí̵kwí̵ yinɨ.” rɨpaxí̵rɨnɨ.